Eftir áralanga baráttu er loksins komið að því að stytta vinnuvikuna án þess að laun skerðist. Samtalið um hvernig og hversu mikið á að stytta ættu að vera farin í gang á öllum vinnustöðum þar sem unnið er í dagvinnu og á vaktavinnustöðum er unnið að því að aðlaga vaktakerfi og tryggja mönnun. Styttingin á að taka gildi í síðasta lagi 1. janúar 2021 hjá þeim sem vinna dagvinnu og þar á starfsfólk að taka virkan þátt í því að ákveða útfærsluna.

Á vaktavinnustöðum styttist vinnuvikan frá 1. maí 2021 og verður útfærslan miðlæg, enda getur hún kallað á ýmsar breytingar. Þetta verður stærsta breytingin á vinnutíma launafólks í nærri hálfa öld, frá því 40 tíma vinnuvikan var tekin upp. Tökum öll þátt í því að gera drauminn um styttri vinnuviku og fjölskylduvænna samfélag að veruleika.